Lo Med’Òc de Pau, en aliança dab l’Universitat de Pau e deus País de l’Ador, l’InÒc Aquitània e Lo Congrès, qu’organizè los 14 e 15 de heurèr a Pau las Assisas de la lenga occitana.
Lo principi d’aquestas assisas qu’èra d’amassar los actors qui utilizan la lenga occitana o ua auta lenga dita « de França » : practicians, universitaris, ensenhaires, elejuts, directors d’institucions, tecnicians de las collectivitats, entà crear ua convergéncia d’idèas e de reflexion entà un ahortiment de l’usatge de la lenga occitana dens los País d’Ador. L'objectiu qu'èra de realizar un diagnostic e un estat deus lòcs tà perméter de har preconizacions entà favorizar lo desvolopament, la foncionalitat e la vitalitat de la lenga.
Georg Kremnitz, lingüista (Universitat de Viena) e sòci deu Conselh lingüistic, que hasó ua conferéncia inaugurau qui portava sus la situacion sociolingüistica de l'occitan. Gilabèrt Mercadier, president deu Congrès, que participè au talhèr tà çò de l'ensenhament e de la formacion dab Felip Biu, sòci deu Conselh lingüistic, ensenhaire a l'Universitat de Pau et deus país d'Ador. Enfin Benaset Dazéas, director deu Congrès, que coanimè lo talhèr tà çò de la mesa en plaça de las politicas lingüisticas.