Lo CIRDÒC organiza la segonda Jornada professionala del malhum Occitanica lo dijaus 28 de mai dins sos locals a Besièrs. La tematica ne serà « La numerizacion del patrimòni per la transmission de las lengas de França ».
Prepausarà de conferéncias, de taulas redondas e de talhièrs autorn de tres tematicas : « Far conéisser, restituir, transmetre. Programas e portals engatjats dins la transmission del patrimòni lingüistic de França », « Patrimònis lingüistics numerizats e difusion dels sabers », « Lo patrimòni numerizat per totes. Quand lo patrimòni occitan numerizat produsís d'otisses educatius, toristics e de creacions artisticas ».
Demest los divèrses intervenents institucionals e universitaris, pel domeni occitan, i serà Perrine Charteau del CIRDÒC (« Occitanica e los portals partenaris ») e, dins l'encastre d'una taula redonda sul patrimòni numerizat e las tecnologias del lengatge, intervendràn tanben Patric Sauzet, President del Conselh lingüistic del Congrès (« Átlas lingüistic de França numerizat ») e Benaset Dazéas, director del Congrès (« Fuèlha de rota 2015-2019 pel desvolopament de las tecnologias del lengatge dins lo domeni occitan : espleitacion dels còrpus textuals »).
Trobaretz lo programa complet sul site del CIRDÒC.
