Eth 17 de deseme que ven s'organize ua maraton de votzes entà començar a enregistrar es prumères votzes araneses.
Er objectiu que perseguís Araina ei eth d'arribar a crear un registre collectiu de votzes en aranés entà transferir-lo as naues tecnologies e qu'aguestes poguen dar era opcion dera expression en aranés e atau, se ne divulgue e se coneishe era lengua per tot eth camp tecnologic e virtuau que mos entornege.
Aguesta iniciatiua ei possibla gràcies ara cooperativa Col·lectivaT que da vida ath Projècte Araina, votzes en aranés.
Atau donques, eth 17 de deseme que ven s'organize era prumèra maraton de votzes ena sala Antara der Ajuntament de Vielha e Mijaran entà enregistrar era votz de persones de parlar aranés de diuèrses edats, registres e parlars entà contribuïr ara creacion d'aguest univèrs sonor e subrevivent dera lengua occitana aranesa. Era maraton començarà a compdar des 10.00 ores deth maitin enquias 14.00 dera tarde, a on s'amassaràn es prumères persones volontàries a cedir era sua votz. De un aute costat, tanben s'aufrís ua opcion telematica pendent tota era dimenjada.
Es persones volontàries auràn de liéger diuèrsi fragments de tèxte que veiràn projectadi en ues pantalhes mentre se procedís ar enregistrament vocau. Es tèxtes hèn part d'òbres literàries classiques tradusides ar aranés per Antòni Nogués. Aguest procès pren vida gràcies ara plataforma dubèrta Common Voice de Mozilla, a on eth projècte Aina a ja enregistrat 2.500 ores de votzes en catalan.
Eth Projècte Araina s'impulsec pera cooperativa Col·lectivaT damb era collaboracion der recercaire dera Universitat de Lhèida, Jordi Suïls Subirà e dera recercaira Helena Torres Purroy, membres deth Conselh Consultatiu der Aranés. Totun, era iniciatiua siguec subvencionada peth Departament de Cultura dera Generalitat de Catalonha en encastre des « Subvencions entà promòir era coneishença e er usatge der occitan, aranés en Aran, en Catalonha » e arrecep eth sosten deth Conselh Generau d'Aran, Lo Congrès permanent de la lenga occitana e era fondacion Mozilla.
